Toshkent to’qimachilik va engil sanoat instituti huzuridagi pedagog kadrlarni qayta tayyorlash va ularning malakasini oshirish tarmoq markazi faoliyati haqida

MA’LUMOT

O‘zbekiston Respublikasi Vazirlar Mahkamasining 2012-yil 26-sentyabrdagi “Oliy ta’lim muassasalari pedagog kadrlarini qayta tayyorlash va ularning malakasini oshirish tizimini yanada takomillashtirish chora-tadbirlari to‘g‘risida”gi 278-son qarori asosida Toshkent to’qimachilik va engil sanoat instituti huzurida Pedagog kadrlarni qayta tayyorlash va ularning malakasini oshirish tarmoq markazi tashkil etildi.

Tarmoq markazi o‘z faoliyatini:

O‘zbekiston Respublikasining 2020-yil 23-sentabrda tasdiqlangan “Ta’lim to‘g‘risida”gi Qonuni;

 O‘zbekiston Respublikasi Prezidentining 2015 yil 12 iyundagi “Oliy ta’lim muassasalarining rahbar va pedagog kadrlarini qayta tayyorlash va malakasini oshirish tizimini yanada takomillashtirish to‘g‘risida”gi PF-4732-son, 2019-yil 27-avgustdagi “Oliy ta’lim muassasalari rahbar va pedagog kadrlarining uzluksiz malakasini oshirish tizimini joriy etish to‘g‘risida”gi PF-5789-son, 2019-yil 8-oktabrdagi “O‘zbekiston Respublikasi oliy ta’lim tizimini 2030 yilgacha rivojlantirish konsepsiyasini tasdiqlash to‘g‘risida”gi PF-5847-son,  2022-yil  28- yanvardagi “2022- 2026 yillarga mo‘ljallangan Yangi O‘zbekistonning taraqqiyot strategiyasi to‘g‘risida”gi PF-60-son, 2023-yil 25-yanvardagi “Respublika ijro etuvchi hokimiyat organlari faoliyatini samarali yo‘lga qo‘yishga doir birinchi navbatdagi tashkiliy chora-tadbirlar to‘g‘risida”gi PF-14-son Farmonlari;

O‘zbekiston Respublikasi Vazirlar Mahkamasining 2019-yil 23-sentabrdagi “Oliy ta’lim muassasalari rahbar va pedagog kadrlarining malakasini oshirish tizimini yanada takomillashtirish bo‘yicha qo‘shimcha chora-tadbirlar to‘g‘risida”gi 797-son hamda 2024 yil 11 iyuldagi “Oliy ta’lim tashkilotlari rahbar va pedagog kadrlarini qayta tayyorlash va malakasini oshirish tizimini samarali tashkil qilish chora-tadbirlari to‘g‘risida”gi 415-sonli qarorlari;

O‘zbekiston  Respublikasi Vazirlar Mahkamasining 2017 yil 5 sentabrdagi 12-2017-sonli buyrug‘i bilan tasdiqlangan “Oliy ta’lim muassasalarining rahbar va pedagog kadrlarini qayta tayyorlash va ularning malakasini oshirish kurslari tinglovchilarining bitiruv (loyiha) ishini tayyorlash va himoyaga taqdim etish tartibi to‘g‘risida”gi nizom talablaridan kelib chiqib, O‘zbekiston Respublikasi Oliy va o‘rta maxsus ta’lim vazirining 2020-yil 14-sentabrdagida “Pedagog kadrlarni qayta tayyorlash va ularning malakasini oshirish markazlarida kasbiy (pedagogik) qayta tayyorlash kurslari faoliyatini yo‘lga qo‘yish to‘g‘risida”gi 479-sonli buyrug‘i asosida olib boradi.

Tarmoq markazining maqsadi:

Oliy ta’lim muassasalari pedagog kadrlarini qayta tayyorlash va malakasini oshirish jarayonlari sifatini takomillashtirish, ularning bilimi va kasbiy mahoratini aniq yo‘nalishlar (mutaxassisliklar) bo‘yicha sohalarining tezkor rivojlanib borishiga uyg‘unlashtirish, tarmoqdagi innovatsiyalarni ta’lim jarayoniga joriy qilish, tegishli sohalar bo‘yicha yangi texnika va texnologiyalarni professor-o‘qituvchilar tomonidan o‘zlashtirishlariga ko‘maklashishdan iborat. 

Ko‘zlangan maqsadga erishish uchun markaz o‘z oldiga quyidagi vazifalarni qo‘yadi:

Oliy ta’lim hamda professional ta’limning tegishli yo‘nalishlari bo‘yicha fanlarning umumkasbiy va maxsus bloklari bo‘yicha qayta tayyorlash va malaka oshirishni amalga oshirish hamda ular bo‘yicha zamonaviy metodik, axborot-resurs bazasini yaratish;

Xorijiy mutaxassislarni shartnoma asosida, shuningdek, mahalliy konstruktorlik-texnologik muassasalar va Respublikadagi yirik korxonalar rahbarlarini taklif etgan holda, eng avvalo, yuqori va innovatsion texnologiyalar sohasida oliy ta’lim muassasalari pedagog kadrlarini qayta tayyorlash va ularning malakasini oshirish ta’lim dasturlarini amalga oshirish;

Ta’limning ishlab chiqarish bilan samarali o‘zaro hamkorligini yo‘lga qo‘yish, oliy ta’lim muassasalari pedagog kadrlarini qayta tayyorlash va ularning malakasini oshirish jarayoniga ko‘chma mashg‘ulotlar, zamonaviy texnika va texnologiyalar bilan jihozlangan korxonalarga tashriflar joriy etilishini ta’minlash;

Tarmoq markazida, shu jumladan ishlab chiqarish, tadqiqot, loyihalash-qidiruv tuzilmalarining moddiy-texnikaviy bazasidan foydalangan holda mashg‘ulotlar o‘tkazish uchun zarur o‘quv va moddiy-texnikaviy bazani yaratish;

Oliy ta’lim muassasalari pedagog kadrlarini qayta tayyorlash va ularning malakasini oshirishning, innovatsion ilmiy yutuqlarni, zamonaviy pedagogik va axborot-kommunikatsiya texnologiyalarini qo‘llashni, masofadan o‘qitishni, mustaqil ta’lim olishni kengaytirishni nazarda tutuvchi texnika va texnologiyalarning istiqbolda rivojlanishini hisobga oluvchi dasturlarini ishlab chiqish va joriy etish;

Oliy ta’lim muassasalarining tegishli yo‘nalishlar bo‘yicha kadrlar tayyorlash sifatini oshirish hamda tarmoqdagi texnik va texnologik taraqqiyotning darajasiga mos ravishda rivojlanishini ta’minlashga yo‘naltirilgan malaka oshirish kurslarini tashkil etish;

Pedagog kadrlarni qayta tayyorlash va malakasini oshirishni amalga oshirishda tarmoqning mavjud imkoniyatlaridan keng foydalanishni tashkil etish.

Tarmoq markazida mashg‘ulotlarning quyidagi turlari joriy qilinadi:

Ma’ruzalar, amaliy va seminar mashg‘ulotlari, ko‘chma mashg‘ulotlar, tajriba almashish bo‘yicha mahorat darslari, mustaqil ish va boshqalar.

Axborot-kommunikatsiya texnologiyalardan foydalangan holda masofaviy o‘qitish tizimi qo‘llaniladi. Tarmoq markazida o‘rnatilgan tartibda tegishli soha korxona va tashkilotlari xodimlari uchun to‘lov-shartnoma asosida malaka oshirish kurslari tashkil qilingan. Tarmoq markazining yo‘nalishlari ro‘yxatiga o‘zgartirish va qo‘shimchalar kiritish Bosh ilmiy-metodik markazining tavsiyasiga ko‘ra Oliy ta’lim, fan va innovatsiyalar vazirligining buyrug‘iga asosan amalga oshiriladi.

Hozirgi kunda tarmoq markazida 3 ta yo‘nalish bo‘yicha oliy ta’lim pedagog kadrlarini malaka oshirish kurslari tashkil etilgan:

1 - Matbaa va qadoqlash muhandisligi

2 - Yengil sanoat muhandisligi (to‘qimachilik sanoati mahsulotlari texnologiyasi)

3 - Yengil sanoat muhandisligi (yengil sanoat mahsulotlari texnologiyasi)

Bundan tashqari markazda quyidagi yo‘nalishlarda pedagog kadrlarni qayta tayyorlash kurslari mavjud:

1. Mehnat muhofazasi va texnik xavfsizlik
2. Ekologiya va atrof muhit muhofazasi
3. Mexanika muhandisligi